Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 469 Hüküm no: 531 Orijinal metin no: [112a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üzüm döğülen beş değirmenin eski yerlerine nakli için ferman talebi Ma‘rûz. İstanbul’da vâki‘ şerbetçi hırfetinin kethüdâsı es-Seyyid Mustafa ve helvacılar kethüdâsı Ali ve ihtiyârlarından müseccelü’l-esâmî yirmi beş nefer Müslimîn meclis-i şer‘de kadîmden metâ‘ımız olup İstanbul’da üzüm döğülen beş aded değirmenlerden kadîmden berü bir nesne taleb olunmaz iken vezîr-i sâbık İbrahim Paşa zamânında müceddeden mukāta‘a kaydolunup hâlâ şeref-efzâ-yı sudûr olan hatt-ı hümâyûn şevket-makrûn mûcebince ref‘ ve resm-i mîrî nâmıyla nesne taleb olunmamak üzere yedimize emr-i şerîf i‘tâ olunmuşdur deyü mazmûnu min-külli’l-vücûh takrîr-i meşrûhalarına mutâbık bir kıt‘a fermân-ı âlîşân ibrâz lâkin zikrolunan beş aded değirmenler mukāta‘a kaydolundukda resm-i mîrî tahsîli âsân olmak için Ahî Çelebi Câmi‘-i şerîfi kurbünde cümlesini mahall-i vâhide vaz‘ olunmağla ashâbına ve bize ta‘assür-i küllî olur deyü tazallüm-i hâl ve zikrolunan beş aded değirmenler ashâbı vaz‘-ı kadîm üzere olageldiği mahallere nakl ve kendileri i‘mâl etmekde kimesne müdâhale etmemek üzere fermân-ı âlîşân iltimâs ettikleri huzûr-ı âlîlerine i‘lâm olundu. Fermân hazret-i veliyyü’l-emrindir. Fî 22 Rebî‘ülâhir sene [1]143.