Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 470 Hüküm no: 532 Orijinal metin no: [112a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İznikmid civarından gemilerle İstanbul’a kereste getiren tüccardan gümrük ve masdariye namıyla alınan verginin kaldırılması talebi Ma‘rûz. Ashâb-ı arzuhâl Körfes ve İznikmid câniblerinden sagīr çekeleveler ile Âsitâne-i sa‘âdete eşyâ-i mütenevvi‘a ile mahlût kereste nakleden tüccârdan sefîne reislerinden olup kadîmü’l-eyyâmdan getirdikleri keresteden gümrük ve masdariyye nâmıyla mütâlebe olundukları yoğiken bin yüz kırk iki senesi Muharremi’l-harâmı gurresinde vâki‘ harîk-ı kebîrden sonra Menteş nâm Yahûdi vezîr-i sâbık İbrahim Paşa’ya istinâd ve gümrükçi-i sâbık ile te‘âdud ve tenâsur edip Karadeniz’den gelen kereste ile memlû sefâin-i kebîreye kıyâsen bunların çekeleve ile menkūl kerestelerine dahi gümrük ve masdariyye nâmıyla dörder beşer guruş ibdâ‘ ve ihdâs etmekle bundan akdem ref‘-i mezâlim için sâdır olan hatt-ı hümâyûn şevket-makrûn mantûku münîfi üzere bu zulmiyye-i muhdese dahi ref‘ olunup mahallinden kaydı terkīn ve yedlerine emr-i âlî ihsân olunmak bâbında istid‘âyı inâyet ederler fi’l-vâki‘ bu misillü bida‘ ve muhdesât ve mezâlimin ref‘i âmme-i mü’mînine hayr-ı muharriz ve bâ‘is-i isticlâb da‘vât-ı sâliha idiği ma‘lûm-ı devletleri buyruldukda emr ü fermân hazret-i veliyyü’l-emrindir. Fî 20 Rebî‘ülâhir sene [1]143.