Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 897 Hüküm no: 1525 Orijinal metin no: [128a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Abdurrahman’ın sattığı kahve bedelinden alacağı olduğu iddiasıyla İbrahim b. Halil aleyhine açtığı davada sulh olduğu Ma‘rûz Mevâdd-ı şer‘iye istimâ‘ı’çün bi’l-iltimâs kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’a tâbi‘ Çenger karyesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde karye-i mezbûre sükkânından Bostanî Kahveci Abdurrahman b. Hasan meclis-i ma‘kūd-ı mezkûrda İbrahim b. Halil mahzarında mezbûr İbrahim bundan akdem yedimden iştirâ eylediği kahve semeninden yirmi altı guruş bi-şarti’r-rücû‘ emriyle Tığlı Mehmed nâm kimesneye olan deyni için def‘ ü teslîm eylediğim sekiz guruş ki cem‘an otuz dört guruş hakkımı taleb eylediğimde beynimize muslihûn tavassut edip müdde‘âm olan meblağ-ı merkūm otuz dört guruşu on dört guruşa sulh olup hattâ meblağ-ı merkūm on dört guruş deyni olduğunu ikrâr ve bir kıt‘a temessük i‘tâ etmekle taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını udûlden Uzun Ahmed Ağa b. el-Hâc Osman ve Bostanî İbrahim Beşe b. Hüseyin nâm kimesneler şehâdetleriyle vech-i şer‘î üzere muvâcehesinde isbât etmeğin mûcibiyle meblağ-ı merkūm on dört guruş müdde‘î-i mezbûr Abdurrahman’a edâ ve teslîme mezbûr İbrahim’e tenbîh eylediğini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 11 min-Ra sene 1207.