Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 470 Hüküm no: 533 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’daki mîrî âlât bükücülerinin kethüdası olan Abdullah b. Abdülkerim’in kethüdalık görevine devam etmesi talebi Ma‘rûz. Mahrûse-i Galata’da vâki‘ mîr[î] âlât bükücü hırfetinden müseccelü’l-esâmî yetmiş sekiz nefer Müslimîn meclis-i şer‘de hâlâ kethüdâları Abdullah b. Abdülkerim mahzarında mezbûr Abdullah Kethüdâ cümlemizin muhtâr ve mu‘temedi olup her hâlde kendiden hoşnûd ve râzılarız ve kendiden mukaddem kethüdâmız olan işbu Topal Süleyman nâm kimesne ziyâde hîlekâr ve kendi hâlinde olmayıp kethüdâlığı hâlinde her birimizi bi-gayr-ı hakkın tecrîm ve tağrîm etmişdir deyü mezbûr Süleyman’ın sû-i hâlini ve kethüdâ-yı merkūmun hüsn-i hâlini ihbâr ve yine kethüdâlık-ı mezbûr kendiye kemâfi’l-evvel ibkā ve mukarrer buyrulmak bâbında fermân-ı âlî iltimâsında oldukları mübâşirleri Mumcu Mehmed Beşe iltimâsıyla huzûr-ı âlîlerine i‘lâm olundu. Fermân hazret-i veliyyü’l-emrindir. Fî 23 Rebî‘ülâhir sene [1]143.