Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 905 Hüküm no: 1543 Orijinal metin no: [129a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Süleyman Efendi’nin bahçe kirasından ve bazincan bedelinden Bahçıvan Yani’den doksun kuruş alacağı olduğu Ma‘rûz Medîne-i Üsküdar hâricinde vâki‘ İbrahim Ağa Zâviyesi’nde sâkin es-Seyyid Süleyman Efendi b. el-Hâc İsmail medîne-i mezbûrede meclis-i şer‘-i hatîrde Bağçevân Yani v. Dimo nâm zimmî muvâcehesinde merkūm Yani zimmî zâviye-i mezbûre kurbünde vâki‘ bir kıt‘a sebze bağçesini beher şehr onar guruş ücret ile istîcâr etmekle bağçe-i mezkûre ücretinden işbu târih-i i‘lâma gelince on dört aylık yüz kırk guruş beynimizde ma‘lûm bazincan semeninden yirmi guruş ki cem‘an yüz altmış guruşun elli guruşunu yedinden ahz, bâkī yüz on guruşu zimmetinde kalmağla taleb ederim deyü da‘vâ ve merkūm Yani cevâbında bağçe-i mezkûre ücretinden on iki aylık yüz yirmi guruş ile bazincan semeninden yirmi guruş ki cem‘an yüz kırk guruşdan bâkī doksan guruşu ikrâr u i‘tirâf edip müdde‘î-i mezbûrun ziyâde müdde‘âsı olan iki aylık yirmi guruşu inkâr etmeğin mûcibiyle müdde‘î-i mezbûr ziyâde müdde‘âsı olan iki aylık yirmi guruşu tashîh ve beyâna ba‘de’l-havâle merkūm Yani zimmînin mu‘terif olduğu meblağ-ı bâkī-i merkūm doksan guruşu müdde‘î-i mezbûr Süleyman Efendi’ye edâsıyla ilzâm olunduğu bi’l-iltimâs huzûr-ı âlîlerine i‘lâm olundu. Fî 15 min-Safer sene 1207.