Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 905 Hüküm no: 1544 Orijinal metin no: [129a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Mustafa’nın bakımını üstlendiği küçük torununun nafaka bedeliyle alakalı olarak eski damadı Ali’ye açtığı davada sulh olduğu Ma‘rûz Medîne-i Üsküdar’da Selami mahallesinde sâkin Mehmed Şâkir b. Ali nâm sagīrin min-kıbeli’l-üm ceddesi ve hâdınesi mu‘arrefetü’z-zât Zeliha bt. Mustafa nâm hatun mahfil-i Bâb’da meclis-i şer‘-i hatîrde dâmâdı Ali b. Abdullah mahzarında mezbûr Ali bundan akdem kızım Âişe bt. Mustafa’nın zevci iken tatlîk edip mezbûre Âişe dahi nefsini zevc-i âhara tezvîc ve sagīr-i mezbûrun hıdânesi bana gelip mezbûr Ali dahi diyâr-ı âhara gitmekle sagīr-i mezbûra bin iki yüz üç senesi Şevvâli’l-mükerrem’in sekizinci günü nâibü’ş-şer‘ olan [A]hıskalı Mehmed Efendi imzâsıyla mümzâ ve mahtûm yedimde olan bir kıt‘a nafaka hücceti mantûkunca sagīr-i mezbûrun yevmî ikişer para nafaka-i mukaddere-i müstedâne-i masrûfesinden işbu târih-i i‘lâma gelince kırk bir ay on günde müctemi‘a olan altmış guruşu bi’l-hıdâne taleb ederim deyü eylediği da‘vâsından bâ-tavassut-ı muslihîn otuz guruş bedel mukābilesinde mezbûr Ali ile sulh olup ziyâde otuz iki guruşa ve sagīr-i mezbûrun nafakası sükûtuna değin nafaka mutâlebesine müte‘allika âmme-i de‘âvîden dâmâdı mezbûr Ali’nin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 18 min-Ra sene 1207.