Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 906 Hüküm no: 1545 Orijinal metin no: [129b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar kalfalarında Zarak ile ortağı Haçador’un Kâtip Ahmed Efendi için yaptıkları evin talepleri üzerine yeniden keşfinin yapıldığı Ma‘rûz Sâdır olan fermân-ı âlîlerine imtisâlen kıbel-i şer‘-i şerîfden meb‘ûs es-Seyyid Abdurrahman Efendi dâ‘îleri ve hâssa mi‘mâr hulefâsından Ali Reşid ve Ahmed halîfeler ile medîne-i Üsküdar’a tâbi‘ Kādı karyesinde vâki‘ Mevkūfât Kalemi küttâblarından Ahmed Efendi b. Osman’ın zikri âtî münâza‘un-fîh olan bi’l-icâreteyn mutasarrıf olduğu menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde arzuhâl eden neccâr kalfalarından Zarak v. Karabet ve şerîki Haçador v. Tomas nâm zimmîler meclis-i ma‘kūd-ı mezkûrda arzuhâlde ismi mezkûr mezbûr Ahmed Efendi mahzarında mezbûr Ahmed Efendi târih-i i‘lâmdan beş ay mukaddem işbu derûnunda akd-i meclis-i şer‘ olunan menzili tecdîd murâd etmekle menzil-i mezkûru ba‘de’l-hedm enkāz-ı kadîmesinden mâ‘adâ bizim kendi kereste ve mismâr ve sıva ve boya ve sâir lâzımesini zam edip ücret-i amelesi dahi kendimiz vermek üzere beher zirâ‘ını yedişer guruş üç rub‘a mukāvele ve bi-şarti’r-rücû‘ emriyle dâhiliye ve hâriciyesi müştemil bir bâb menzil binâ ve bin yedi yüz altmış beş guruşunu ceste ceste bize edâ ve teslîm lâkin masrûfumuz ziyâde olmağla akd-i mezbûrun fesâdına binâen menzil-i mezbûr mesâha ve keşf ve mu‘âyene olunmak matlûbumuzdur dediklerinde mi‘mârân-ı mezbûrân ve sâir ehl-i vukūf menzil-i mezkûra ba‘de’n-nazar mesâha eyledikleri mecmû‘-ı menzil tûlen ve arzan be-hesâb-ı terbî‘î iki yüz kırk yedi zirâ‘ olup atik enkāzın beher zirâ‘ı doksanar paradan cedîd kerestenin beher zirâ‘ı sekizer guruş otuzar paradan cedîd ve atik mahlût olarak on bir guruşdan iki bin yedi yüz on yedi guruş ve menzil-i mezkûrun matbahı civârında açık mahâllin duvar ta‘mîri ve sokak kapısı dâhilinde açık mahâllin saçağı elli altı guruş ki min-haysü’l-mecmû‘ iki bin yedi yüz yetmiş üç guruşa bâliğ ve nâ-tamam olan mahallerin ta‘mîri yüz otuz sekiz guruş ile tekmîl olur deyü mi‘mârân-ı mezbûrân ve sâir ehl-i vukūf ihbârlarıyla zâhir ve bâlâda mezkûr doksanar para fiyât vaz‘ olunan atik enkāzın kıymeti olan beş yüz elli beş buçuk guruş ve müdde‘iyân-ı mezbûrânın kabzlarını mu‘terif olduğu bin yedi yüz altmış beş guruş ve nâ-tamam olan mahallerin tekmîli için meblağ-ı merkūm yüz otuz sekiz guruş ki cem‘an iki bin dört yüz elli sekiz buçuk guruş fürû-nihâde olunup mezbûr Ahmed Efendi zimmetinde zuhûr eden üç yüz on dört buçuk guruşu müdde‘iyân-ı merkūmâna bi’r-rızâ edâya ta‘ahhüd onlar dahi râzılar olduklarını mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 29 min-S sene 1207.