Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 471 Hüküm no: 534 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Darbhâne-i âmire’den Receb b. Abdullah’ın Yahûdi David ve İlya üzerine açtığı davada haksız olduğu Ma‘rûz. Muhzır Ahmed mübâşeretiyle ihzâr-ı şer‘ olunan David ve İlya nâm Yahûdilerden hasımları Receb b. Abdullah meclis-i şer‘de Darbhâne-i âmire’de kalcılık hırfeti benim uhdemde olup hizmet-i mezkûrede ben üstâd ve mahâretim olmağla mezbûrân Yahûdiler mümâna‘at ederler deyü bi’l-fi‘il Darbhâne-i âmire nâzırı Mehmed Efendi dâ‘îleri hâzır olduğu hâlde da‘vâ eyledikde mesfûrân Yahûdiler cevâblarında biz amele makūlesinden olup hizmet-i mezkûre nâzırlara müfevvaz umûrdan olduğundan mâ‘adâ mukaddemâ müdde‘î-i mezbûr Receb hizmet-i mezkûrda üzerimize kethüdâlık da‘vâsına şürû‘ ve ba‘de’l-yevm müdâhale ve mu‘âraza etmemek üzere elli guruş bedel-i makbûzu mukābelesinde Mahmud Paşa Mahkemesi’nde sâbıkā nâibü’ş-şer‘ olan Nedim Efendi huzûrunda yedimize hüccet dahi vermişdir deyü takrîrlerine muvâfık bir kıt‘a hüccet ibrâz ve müşârun-ileyh Mehmed Efendi dâ‘îleri dahi hizmet-i mezkûre kimesnenin uhdesinde olur makūleden olmayıp nâzırlara müfevvaz umûrdan idiğini ba‘de’l-ihbâr mezbûr Receb mazmûn-ı hüccet-i mezkûreyi ikrâr u i‘tirâf etmeğin mûcebince mezbûr Receb bî-vech mu‘ârazadan men‘ olunduğu huzûr-ı âlîlerine i‘lâm olundu. Fermân men-lehü’l-emrindir. Fî 20 R sene 1143.