Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 907 Hüküm no: 1546 Orijinal metin no: [129b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dellak Zeynelabidin tarafından tartaklandığını iddia eden Arabacı İbrahim Beşe’nin durumunun tahkiki Ma‘rûz Medîne-i Üsküdar’da Doğancılar kurbünde sâkin Arabacı İbrahim Beşe b. Ali meclis-i şer‘-i hatîrde târih-i i‘lâmdan üç gün mukaddem ba‘de’z-zuhr medîne-i mezbûrede vâki‘ Hacıpaşa Hamamı’nda sâkin Dellâk Zeynelabidin nâm kimesne hamam-ı mezkûr derûnunda beni bi-gayrı hakkın amden taşra çık deyü sağ elimden çekip ve sağ geğreğim üzerine taşa ilkā eylediğinden nâşi zikr olunan geğrek kemiğime veca‘ hâsıl ve hareket eylediğimde usreti olmağla kıbel-i şer‘den keşf ve mu‘âyene olunmak matlûbumdur dedikde cerrâh tâifesinden el-Hâc Ali Efendi ve sâir mazbûtü’l-esâmî Müslimîn ile mezbûr İbrahim Beşe’nin a‘zâsına nazar eylediklerinde fi’l-hakīka mezbûr İbrahim’in zikr olunan sağ geğreği ve sâir a‘zâsında eser-i darb ve kara bere misillü nesnesi olmayıp ancak düşmeden nâşi sağ geğreği kemiğine ber-vech-i muharrer veca‘ hâsıl olmuşdur deyü ba‘de’l-keşf ve’l-mu‘âyene vâki‘ hâl bi’l-iltimâs huzûr-ı âlîlerine i‘lâm olundu. Fî 15 min-Ra sene 1207.