Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 907 Hüküm no: 1547 Orijinal metin no: [129b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Avanis’in ekmek bedelinden alacağı olduğu iddiasıyla Yahudi Yako’ya açtığı davada sulh olduğu Ma‘rûz Medîne-i Üsküdar’a tâbi‘ Kuzguncuk karyesinde mütemekkin Etmekci Avanis v. Haraz nâm zimmî medîne-i mezbûre Bâb Mahkemesi’nde meclis-i şer‘-i hatîrde karye-i mezbûrede mütemekkin Yako v. İlya nâm Yahûdî muvâcehesinde târih-i i‘lâmdan on dört sene mukaddem merkūmun babası merkūm İlya yedimden iştirâ ve kabz eylediği nân-ı azîz semeninden altı yüz guruş hakkımı kable’l-ahz ve’l-istifâ hâlik olup ba‘dehû merkūm Yako ve karındaşları gāibân ani’l-meclis Salamon ve Baron Yahûdîler kezâlik yedimden iştirâ eyledikleri nân-ı azîz semeninden yüz elli guruş ki cem‘an yedi yüz elli guruş hakkımın bin yüz doksan dokuz senesi Muharrem’inin on sekizinci günü hesâbını görüp hattâ işbu sene Safer’inin yirmi birinci günü merkūm Yako Yahûdî’den taleb eylediğimde meblağ-ı mecmû‘-ı merkūmu zimmetinde deyni olduğunu ikrâr dahi etmişdi deyü da‘vâ eyledikde merkūm Yako külliyen inkâr etmeğin müdde‘î-i merkūm ber-vech-i muharrer müdde‘âsını beyân esnâsında beynlerine muslihûn tavassut edip müdde‘î-i merkūm Avanis zimmî tasaddî eylediği da‘vâsından an-inkâr iki yüz elli guruş mukābilesinde merkūm Yako Yahûdî ile sulh olup ziyâde müdde‘âsına ve bi’l-cümle husûs-ı merkūma müte‘allika âmme-i de‘âvîden merkūm Yako ile karındaşları gāibân-ı merkūmân Salamon ve Baron Yahûdîlerin zimmetlerini ba‘de’l-ibrâ ve’l-kabûl merkūm Yako bedel-i sulh-ı merkūm iki yüz elli guruşu işbu târih-i i‘lâmdan otuz bir gün tamamında müdde‘î-i merkūm Avanis zimmîye edâ ve teslîme ta‘ahhüd edip bu vechile kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 21 min-Ra sene 1207.