Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 908 Hüküm no: 1548 Orijinal metin no: [129b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Mustafa’nın başına vurup bir miktar para ve eşyasını aldığı iddiasıyla Bostancı Hüseyin’e açtığı davada sulh olduğu Ma‘rûz Medîne-i Üsküdar’a tâbi‘ Orta karyesi sükkânından Yusuf b. Mustafa nâm kimesne medîne-i mezbûrede mahfil-i Bâb’da meclis-i şer‘-i hatîrde Bostanî Hüseyin b. Süleyman mahzarında mezbûr Hüseyin târih-i i‘lâmdan altmış beş gün mukaddem karye-i mezbûre kurbünde Kayışdağı nâm mahâlde bi-gayrı hakkın sopa ile başıma darb ve darbından nâşi sâmi‘ama za‘af târî olup kulağım işitmez olduğundan mâ‘adâ kese derûnunda nakden yedi guruş ile altmış para kıymetli bir aded havlumu ahz etmekle mûcib-i şer‘îsini mezbûr Hüseyin’den taleb ederim deyü tasaddî eylediği da‘vâsından bâ-tavassut-ı muslihîn sekiz guruş bedel mukābilesinde sulh olup bi’l-cümle husûs-ı mezkûra müte‘allika âmme-i de‘âvîden mezbûr Hüseyin’in zimmetini ba‘de’l-ibrâ ve’l-kabûl kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî 25 min-M sene 1207.