Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 914 Hüküm no: 1560 Orijinal metin no: [131a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Kosta’nın terekesinden Teberdar Hasan Ağa’ya olan borcunu ödeyen kefili Kosta’ya yüz on kuruş ödenmesine karar verildiği Ma‘rûz Mevâdd-ı şer‘iye istimâ‘ı’çün kıbel-i şer‘den meb‘ûs Mehmed Esad Efendi dâ‘îleri medîne-i Üsküdar’da tâbi‘ Kādı karyesinde vâki‘ Kapı Ağası bağçesine varıp mazbûtü’l-esâmî Müslimîn huzûrlarında akd-i meclis-i şer‘-i şerîf etdikde bağçe-i mezkûrede bağçevân iken bundan akdem hâlik olan Kosta v. Metro nâm zimmînin terekesini ahz ü kabzı ve deynini îfâya vasî nasb olunan es-Seyyid Mustafa b. Hasan mahzarında târih-i i‘lâmdan altı ay mukaddem hâlik-i merkūmun gāib ani’l-meclis Teberdâr Hasan Ağa b. Abdullah nâm kimesneye cihet-i karzdan yüz on guruş deyni olup ben bi-şarti’r-rücû‘ emriyle kefîl ve zâmin olduğumdan mâ‘adâ meblağ-ı merkūmu kefâletime binâen mâlımdan mezbûr Hasan Ağa’ya edâ ve teslîm edip kable’l-ahz ve’l-istifâ merkūm Kosta zimmî hâlik olup terekesine bi’l-vesâye vâzı‘ü’l-yed olan mezbûr es-Seyyid Mustafa’dan taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını udûlden Bağçevân Angeli v. Hıristo ve Bağçevân Dimitri v. Petro nâm zimmîler şehâdetleriyle muvâcehesinde isbât etmeğin gıbbe’t-tahlîfi’ş-şer‘î mûcibiyle meblağ-ı merkūm yüz on guruşu makbûzu olan terekesinden müdde‘î-i merkūm Kosta zimmîye edâ ve teslîme tenbîh eylediğini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 10 min-Ra sene 1207.