Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 918 Hüküm no: 1569 Orijinal metin no: [131b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İsmail’in alacağı olduğu iddiasıyla açtığı davada alacağı olduğu Ma‘rûz Medîne-i Üsküdar’da Yenimahalle’de kasab dükkânında sâkin Kasab İsmail b. Ahmed nâm kimesne medîne-i mezbûrede mahfil-i Bâb’da meclis-i şer‘-i hatîrde kanadâr Foti v. Dimo nâm zimmî muvâcehesinde merkūm Foti zimmî kanadârım olup târih-i i‘lâmdan yedi ay mukaddem zebh eylediği ağnâmımdan hâsıl olan yapağıyı kendiye hibe ve teslîm ve âhara otuz guruşa bey‘le ba‘de’l-istihlâk hâlâ hibe-i mezbûremden rücû‘ etmemle meblağ-ı merkūm otuz guruş ile emrimle âhara bey‘ eylediği sakat ta‘bîr olunur baş ve ayak ve bir aded ganem semenlerinden bâkī on guruş ki cem‘an kırk guruşu taleb ederim deyü da‘vâya tasaddî ve bu misillü ba‘de’l-istihlâk hibe da‘vâsı mesmû‘a olmayıp merkūm Foti zimmîye suâl dahi teveccüh etmemekle müdde‘î-i mezbûrun mâ‘adâ müdde‘âsı olan on guruşun beş guruşu müdde‘î-i mezbûr zimmetinde deyni olduğunu ikrâr ziyâde beş guruşu inkâr etmeğin müdde‘î-i mezbûr ziyâde müdde‘âsı olan beş guruşu beyândan izhâr-ı acz birle bi’t-taleb merkūm Foti zimmî gıbbe’t-tahlîfi’ş-şer‘î mûcibiyle müdde‘î-i mezbûr ziyâde müdde‘âsı olan meblağ-ı merkūm beş guruş da‘vâsıyla merkūm Foti zimmîye bilâ-beyyine mu‘ârazadan ba‘de’l-men‘ ancak merkūm Foti zimmînin mertebe-i ikrârı olan beş guruşun edâsıyla şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 17 min-Ra sene 1207.