Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 921 Hüküm no: 1574 Orijinal metin no: [132a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Musa’nın alacağı olduğu iddiasıyla açtığı davada sulh olduğu Ma‘rûz Medîne-i Üsküdar’da Büyük İskele hamallarından Halil b. Musa mahfil-i Bâb’da meclis-i şer‘-i hatîrde mu‘arrefetü’z-zât Âişe bt. Mehmed mahzarında mezbûre Âişe bundan akdem zevcinden mutallaka olup ba‘de inkızâ’i’l-idde nefsini bana tezvîc murâd etmekle ben dahi hâzıra bi’l-meclis ammetesi Zahide bt. Hüseyin yediyle mehr-i mu‘accel nâmıyla medfû‘um olan on guruş ve yine hâzır bi’l-meclis Hammâl Hasan b. Mehmed yediyle nafakası için emriyle sarf eylediğim külle yevmin onar paradan iki ayda müctemi‘a olan on beş guruş ki cem‘an yirmi beş guruş zimmetinde olup hâlâ nefsini bana tezvîcden imtinâ‘ birle mukaddemâ zevci olan kimesneye tezvîc etmekle medfû‘ ve masrûfum olan meblağ-ı merkūm yirmi beş guruşu taleb ederim deyü eylediği da‘vâsından bâ-tavassut-ı muslihîn yirmi guruş bedel-i makbûz mukābilesinden mezbûre Âişe ile sulh olup ziyâde müdde‘âsı beş guruşa müte‘allika âmme-i de‘âvîden mezbûre Âişe’nin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-S sene 1207.