|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 260 Hüküm no: 364 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mustafa Beşe kendisini yaralayan Dilaver’i sulh bedeli karşılığı affettiği
Husûs-ı âtî <> ‘r-rakīm mahallinde ketb ü terkīm olunması’çün bi’t-taleb irsâl olunan mevlânâ Abdulkādir Efendi mahmiye-i İstanbul’da Gül Câmi‘-i şerîfi Mahallesi’nde vâki‘ Süleyman odalarında sâkin Mustafa Beşe b. Yusuf nâm mecrûhun odasına varıp zeyl-i kitâbda mastûrü’l-esâmî olan Müslimîn huzûrlarında akd eylediği meclis-i şer‘-i şerîfde mezbûr Mustafa Beşe işbu bâ‘isü’l-kitâb Dilaver b. Abdullah mahzarında ikrâr-ı tâm ve takrîr-i kelâm edip mezbûr Dilaver b. ( ) târîh-i kitâbdan üç gün mukaddem Cebeali kapısı hâricinde kabîl-i mağribde sol cânibimden küreğim üzerinden bıçak ile vurup mecrûh eylemişdi. El-hâletü hâzihî tavassut-ı Müslimîn ile merkūm Dilaver yedinden ücret-i cerrâh ve semen-i edviye deyü iki bin dört nakd râyic fi’l-vakt fıddî akçe ahz u kabz edip cerâhat-i mezbûre ve ondan hâdis olandan mezbûr Dilaver’i afv edip da‘vâdan zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, min-ba‘d da‘vâ ve nizâ‘ım kalmadı dedikde gıbbe’t-tasdîkı’l-mu‘teber vâki‘ hâli mevlânâ-yı mezbûr mahallinde tahrîr <> ba‘dehû geli[b] zeyl-i kitâbda isimleri muharrer olan Müslimîn ile meclis-i şer‘[de] herbiri vukū‘u üzere inhâ ve takrîr etmeğin mâ-vaka‘a gıbbe’t-taleb ketb ü sebt olundu.
Tahrîren fi’l-yevmi’s-sâmin ve’l-ışrîn min-Cemâziyelâhire li-sene erba‘a ve sittin ve elf.
Şuhûdü’l-hâl: Ahmed Ağa b. Mehmed ser-oda, Tüfenkçi İbrahim Beşe b. Ramazan el-mübâşir, Ali Beşe b. Mustafa er-râcil, Osman Beşe b. Mustafa er-râcil, Mustafa Beşe b. Kurd er-râcil, Siyavuş Beşe b. Abdullah er-râcil, Ali Çelebi b. Zülfikār ve gayruhum.
|