Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 471 Hüküm no: 536 Orijinal metin no: [112b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mehmed Çelebi’nin inşa ettiği menzilde Fâtıma Hatun bt. Abdullah ile ortak kullandıkları damlalığı gasbettiğini itiraf ettiği Ma‘rûz. İmtisâlen li’l-emri’l-âlî kıbel-i şer‘den ba‘s olunan keşif nâibi Abdurrahman Efendi dâ‘îleri hâssa mi‘mârlarından el-Hâc Mustafa b. Ali nâm kimesne ile İstanbul’da Derviş Ali Mahallesi’nde matbah emîni Mahmud Efendi nâm sâhibü’l-hayrın evkāfı müstagallâtından olup derûn-ı arzuhâlde mezkûr olan es-Seyyid Mehmed Çelebi b. Mustafa Efendi’nin ba‘de’l-harîk bi’l-icâreteyn dâhil-i havza-i tasarrufu olan bir bâb muhterik menzil arsası üzerine varıp ba‘de akdi’l-meclis arsa-yı merkūmeye muttasıl mülk muhterik menzil arsasına mutasarrıfe olan sâhibe-i arzuhâl Fâtıma Hatun bt. Abdullah meclis-i ma‘kūd-ı mezkûrda mezbûr es-Seyyid Mehmed Çelebi mahzarında kāimmakām-ı mütevellî-i vakf-ı mezbûr Ali Efendi b. Mustafa Efendi hâzır olduğu hâlde kable’l-harîk benim menzilim ile ol vakıf menzil mâbeyninde arzen on sekiz parmak müşterek tûlânî damlalık aralığı olup benim menzilimin tûlânî on üç buçuk zirâ‘ sakfının saçağı suyu ve ol menzilin mikdâr-ı mezbûru nısfı mertebesi tûlânî saçağının suyu ol damlalığa ale’l-iştirâk akagelmişiken hâlâ es-Seyyid Mehmed Çelebi ol damlalığı gasb ve üzerine li-ecli’l-binâ direklerini nasbeyledi deyü ba‘de’d-da‘vâ ve’l-inkâr mezbûre Fâtıma Hatun’un müdde‘âsına İbrahim b. Ali el-müezzin ve Mustafa b. Ali ve es-Seyyid Mehmed Çelebi b. es-Seyyid Siyamî ve Abdi Beşe b. Mustafa ve Ahmed Çelebi b. <> Abdullah nâm kimesneler şehâdet ettiklerinde kable’t-tezkiye ve’l-hükm mezbûr es-Seyyid Mehmed Çelebi inân-ı kelâmını semt-i inkârdan cânib-i ikrâra tahvîl ve nasbeylediği direklerini başdan başa dokuz parmak kendi cânibine çekmek üzere ta‘ahhüd ve ta‘vîl eylediğini mezbûr dâ‘îleri mahallinde imlâ ba‘dehû ma‘an ba‘s olunan ümenâ-i şer‘le bu dâ‘îlerine inhâ eylediği huzûr-ı âlîlerine i‘lâm olundu. Fî 23 Rebî‘ülâhir sene [1]143.