Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 924 Hüküm no: 1579 Orijinal metin no: [132b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahire bt. İbrahim’in mehir alacağı olduğu iddiasıyla eski kocasına açtığı davada iddiasını ispat edemediği Ma‘rûz Medîne-i Üsküdar’da Toygar Hamza mahallesinde sâkine mu‘arrefetü’z-zât Tâhire bt. İbrahim nâm hatun medîne-i mezbûrede mahfil-i Bâb’da meclis-i şer‘-i hatîrde zevc-i sâbıkı Mehmed Sadık b. Mehmed nâm kimesne mahzarında ben mezbûr Mehmed Sadık’ın otuz guruş mehr-i müeccel tesmiyesiyle zevce-i medhûlün-bihâsı iken mezbûr Mehmed Sadık târih-i i‘lâmdan üç sene mukaddem beni tatlîk etmekle mehr-i merkūm otuz guruş hakkımı taleb ederim deyü da‘vâ ve mezbûr Mehmed Sadık cevâbında müdde‘iye-i merkūme mukaddemâ ber-vech-i muharrer zevce-i medhûlün-bihâsı olduğunu ikrâr lâkin hîn-i tefrîkde müdde‘iye-i mezbûre huzûr-ı Müslimînde mehr-i müeccel-i merkūm otuz guruşdan fâriğa olup nafaka-i iddet-i ma‘lûmesi ve meûnet-i süknâsı dahi kendi üzerine olmak üzere benim ile muhâla‘a-i sahîha-i şer‘iye ile hul‘ olup hukūk-ı zevciyete müte‘allika âmme-i de‘âvîden dahi zimmetimi ibrâ etmişdi deyü eylediği def‘ini Mehmed Emin b. Ahmed ve Hasan Ağa b. Hamza nâm kimesneler şehâdetleriyle ber-nehc-i şer‘î müdde‘iye-i mezbûre muvâcehesinde isbât etmeğin mûcibiyle müdde‘iye-i mezbûre husûs-ı mezkûrda mezbûr Mehmed Sadık’a bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 25 min-şehri Ra sene 1207.