Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 924 Hüküm no: 1580 Orijinal metin no: [132b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Resul’ün şirket malından alacağı olduğu iddiasıyla ortağı Molla Abdullah’a açtığı davada iddiasını ispat edemediği Ma‘rûz Medîne-i Üsküdar’da Arakıyeci el-Hâc Cafer mahallesinde sâkin İbrahim b. Resul nâm kimesne medîne-i mezbûrede mahfil-i Bâb’da meclis-i şer‘-i hatîrde Molla Abdullah b. Abdullah nâm zenci mahzarında re’s-i mâlın kırk guruşu benim ve yüz kırk beş guruşu mezbûr Molla Abdullah’ın olup fâide beynimizde münâsafeten olmak üzere mezbûr Molla Abdullah ile akd-i şirket ve gāib ani’l-meclis Harzuman nâm zimmînin medîne-i mezbûre hâricinde vâki‘ bir kıt‘a bağının üzümünü yüz seksen beş guruşa iştirâ ve âhara iki yüz on iki guruş semen-i makbûza bey‘ olundukdan sonra ba‘de ihrâci re’si’l-mâl ve’l-mesârif hâsıl olan yirmi yedi guruş fâideyi şerîkim mezbûr kabz edip meblağ-ı merkūmdan benim hisseme isâbet eden on üç buçuk guruşun altı buçuk guruşunu yedinden ahz ve yedi guruşu zimmetinde kalmağla taleb ederim deyü da‘vâ ol dahi cevâbında ancak on üç buçuk guruş fâide hâsıl olup kabz eylediğini ikrâr ziyâde on üç buçuk guruşu inkâr etmeğin müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle Molla Abdullah gıbbe’t-tahlîfi’ş-şer‘î mûcibiyle müdde‘î-i mezbûr da‘vâ-yı mezkûresiyle mezbûr Molla Abdullah’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-R sene 1207.