Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 927 Hüküm no: 1585 Orijinal metin no: [133a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın mahzen kirasından alacağı olduğu Ma‘rûz Mahmiye-i İslâmbol’da Küçükayasofya mahallesinde sâkin İbrahim Ağa b. Mehmed medîne-i Üsküdar’da mahfil-i Bâb’da meclis-i şer‘-i hatîrde Moşon v. İsak Yahûdî muvâcehesinde merkūm Moşon Yahûdî emlâkimden olup medîne-i mezbûreye muzâfe Kartal nâhiyesinde vâki‘ mahzenimde beher sene yüzer guruş ücret kavliyle müstecirim olup bundan akdem güzeşte altı buçuk aylık elli dört guruş yedi para ile bir senelikden bâkī yirmi guruş ki cem‘an yetmiş dört guruş yedi para zimmetinde kalmağla taleb ederim deyü da‘vâ merkūm Moşon Yahûdî cevâbında müdde‘î-i mezbûra altı buçuk aylık icâreyi inkâr ve yirmi guruşu ta‘mîre sarf edip ol dahi râzı olmuşdu deyü eylediği def‘ini beyâna kādir olamayıp talebiyle müdde‘î-i mezbûr gıbbe’t-tahlîfi’ş-şer‘î müdde‘î-i mezbûr ber-vech-i muharrer müdde‘âsını lede’t-tezkiye adâletleri zâhir olan yine mahalle-i mezbûre sükkânından Berber Ahmed b. Veli ve Halil b. Ahmed nâm kimesneler şehâdetleriyle vech-i şer‘î üzere isbât etmeğin mûcibiyle meblağ-ı merkūm yetmiş dört guruş yedi parayı müdde‘î-i mezbûra edâ ve teslîme merkūm Moşon Yahûdî’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Ra sene 1207.