Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 929 Hüküm no: 1589 Orijinal metin no: [133b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davit v. Kigork’un otuz üç günlük hizmet ücretinden alacağı olduğu hususunda sulh olduğu Ma‘rûz Medîne-i Üsküdar’da Ayazma mahallesinde mütemekkin Davit v. Kigork nâm zimmî mahfil-i Bâb’da meclis-i şer‘-i hatîrde bundan akdem hâlik olan İncici Norsis v. Karabet zimmînin verâseti zevcesi Turfanda bt. Ağna (Ağya) nâm Nasrâniye ile sulbî kebîr oğlu Gaspar zimmîye inhisârından sonra kendi nefsinden asîl ve anası zevce-i merkūme Turfanda tarafından ber-vech-i âtî vekîl-i şer‘îsi merkūm Gaspar muvâcehesinde târih-i i‘lâmdan iki sene mukaddem beher yevm yirmişer para ücret kavliyle hâlik-i merkūm Norsis zimmî ile vârisân-ı merkūmâna otuz üç gün hizmet etmemle ücretim olan on altı buçuk guruş hakkımı merkūm Gaspar zimmîden taleb ederim deyü tasaddî eylediği da‘vâsından bâ-tavassut-ı muslihîn beş guruş bedel-i makbûza merkūm Gaspar ile sulh olup ziyâde on bir buçuk guruşa ve bi’l-cümle husûs-ı mezkûra müte‘allika âmme-i de‘âvîden merkūm Gaspar ile anası merkūme Turfanda’nın zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-gurreti Zilka‘de sene 1206.