Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 930 Hüküm no: 1590 Orijinal metin no: [133b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhzırbaşı Süleyman Ağa’nın alacağını Arabgirli İsmail’in iki buçuk sene içerisinde ödemesine razı olduğu Ma‘rûz Medîne-i Üsküdar Mahkemesi’nde Muhzırbaşı Süleyman Ağa b. Ömer medîne-i mezbûrede mahfil-i Bâb’da meclis-i şer‘-i hatîrde Arabgirli İsmail b. İbrahim nâm kimesne mahzarında mezbûr İsmail târih-i i‘lâmdan bir sene mukaddem bâ-temessük yedimden istikrâz ve kabz ve umûruna sarfla istihlâk eylediği yüz otuz guruş hakkım ile medîne-i mezbûre hâricinde Çavuşbaşı Çiftliği’nde vâki‘ ma‘lûmü’l-kıt‘a tarlâtı ma‘an istîcâr tohum benim ve iki çift öküz ve çift âlâtı beynimizde münâsafeten taksîm etmek üzere bundan akdem akd-i müzâra‘a edip ba‘dehû ahz ü i‘tâ ve masrûfâtımızın sahîhan hesâbını rü’yet ve mezbûr İsmail’in hissesine isâbet eden masrûfât ile yedimden iştirâ eylediği bir çift öküz ve nısf çiftçi âlâtı semeni ve hâsıl olan mezrû‘âtdan zimmetinde zuhûr eden dört yüz doksan üç buçuk guruş ile cihet-i mezkûr yüz otuz guruş ki cem‘an altı yüz yirmi üç buçuk guruşu mezbûr İsmail’den taleb eylediğimde beynimizde münâza‘ât-ı kesîre ve muhâsamât-i ekîde vâkı‘a olmuşdu el-hâletü hâzihî beynimize muslihûn tavassut edip beni da‘vâ-yı mezkûremden mezbûr İsmail beş yüz guruş üzerine inşâ-i akd-i sulh eylediklerinde ben dahi sulh-ı merkūmu kabûl ve ziyâde müdde‘âm olan yüz yirmi üç buçuk guruşa ve ibtidâ-yı akd-i şirketden işbu târih-i i‘lâma beynimizde cereyân eden cemî‘-i ahz ü i‘tâ ve mu‘âmelât-ı şettâ ve hukūk-ı sâireye müte‘allika âmme-i de‘âvîden herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik lâkin mezbûr İsmail bedel-i sulh-ı merkūm beş yüz guruşu def‘aten edâya kudreti olmayıp tecîle tâlib olmağla ben dahi târih-i i‘lâmdan beş sene tamamında ikişer yüz guruşdan cem‘an iki buçuk sene tamamında beş yüz guruşu tecîl ve taksît eylediğimde ol dahi ber-vech-i muharrer müeccelen ve mukāssatan edâya ta‘ahhüd eyledi dediğini müdde‘î-i mezbûr Süleyman Ağa’nın bi’l-cümle takrîr-i meşrûhunu mezbûr İsmail vicâhen ve şifâhen tahkīk ve tasdîk ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 14 min-S sene 1207.