Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 930 Hüküm no: 1591 Orijinal metin no: [133b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Lazari’nin kereste bedelinden alacağı olduğu iddiasıyla açtığı davada sulh olduğu Ma‘rûz Mahmiye-i İslâmbol’da Odunkapısı dâhilinde mütemekkin Keresteci Lazari v. Simyon medîne-i Üsküdar’da meclis-i şer‘-i hatîrde Hafız es-Seyyid Süleyman Efendi b. İsmail mahzarında târih-i i‘lâmdan iki sene mukaddem mezbûr Hafız es-Seyyid Süleyman yedimden iştirâ ve kabz eylediği fiyât beynimizde ma‘lûm ecnâs-ı kereste semeninden ba‘de külli’l-hesâb bâkī yirmi bir guruş zimmetinde hakkım kalmağla taleb ederim deyü eylediği da‘vâsından bâ-tavassut-ı muslihîn on iki guruş bedel-i makbûza mezbûr Hafız es-Seyyid Süleyman Efendi ile sulh olup ziyâde müdde‘âsı olan dokuz guruşa müte‘allika âmme-i de‘âvîden mezbûr Hafız es-Seyyid Süleyman Efendi’nin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 13 min-C sene 1206.