Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 931 Hüküm no: 1592 Orijinal metin no: [134a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Koğas’ın mor çuka binişini haksızca ele geçirdiği iddiasıyla açtığı davada sulh olduğu Ma‘rûz Medîne-i Üsküdar’da Selami mahallesinde mütemekkin Karabet v. Koğas nâm zimmî meclis-i şer‘-i hatîrde Koltukçu Manas v. Bedros zimmî muvâcehesinde târih-i i‘lâmdan yirmi iki gün mukaddem emlâkimden kırk guruş kıymetli İngiliz şalîsi bir mor çuka binişim menzilimde nerdubânda asılı iken hâzır bi’l-meclis Andriyas v. Avanis nâm sagīr ahz edip merkūm Manas zimmîye bey‘ etmekle zikr olunan biniş-i merkūm Manas zimmîden taleb ederim deyü da‘vâ merkūm Manas cevâbında mezkûr biniş sagīr-i merkūm Andriyas’dan doksan paraya iştirâ ve dört guruşa âhara bey‘ eylediğini ikrâr ziyâde kıymetini ba‘de’l-inkâr müdde‘î-i merkūm ziyâde müdde‘âsını beyân esnâsında bâ-tavassut-ı muslihîn eylediği da‘vâsından yirmi beş guruş bedel mukābilesinde merkūm Manas zimmî ile sulh olup ziyâde müdde‘âsı olan on beş guruşa müte‘allika âmme-i de‘âvîden merkūm Manas zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-selhi M sene 1207.