Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 932 Hüküm no: 1594 Orijinal metin no: [134a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akkambaşı Seyyid Hacı Ahmed Ağa’nın alacağı olduğu iddiasıyla açtığı davada sulh olduğu Ma‘rûz Medîne-i Üsküdar’da Mehmedpaşa mahallesinde sâkin Akkâmbaşı es-Seyyid el-Hâc Ahmed Ağa b. es-Seyyid İbrahim mahfil-i Bâb’da meclis-i şer‘-i hatîrde el-Hâc Osman b. Mustafa mahzarında mezbûr el-Hâc Osman işbu sene-i mübârekede hacc-ı şerîf avdetinde Şâm-ı Şerîf’den İznik kasabasına gelince yedimden istîcâr eylediği bir tek mahfe ücretinden yüz elli guruş ve bir re’s binek bârgiri ücretinden yüz yirmi guruş ve bir hamûle bârgiri ücretinden yetmiş guruş ve beher kıyyesi birer guruşdan on üç vakıyye zemzemiye ve hurma nakliye ücretinden on üç guruş ki cem‘an üç yüz elli üç guruş ücretin iki yüz yirmi guruşunu yedinden ahz ve yüz otuz üç guruşu zimmetinde bâkī kalmağla taleb ederim deyü da‘vâ ve mezbûr el-Hâc Osman cevâbında Şâm-ı Şerîf’de müdde‘î-i mezbûr ile ancak iki yüz yirmi guruşa kavl etmişdim deyü müdde‘î-i mezbûrun ziyâde müdde‘âsını inkâr ve beynlerinde ba‘de vukū‘i’l-münâza‘a müdde‘î-i mezbûr tasaddî eylediği da‘vâsından bâ-tavassut-ı muslihîn elli guruş bedel-i makbûz mukābilesinde mezbûr el-Hâc Osman ile sulh olup ziyâde seksen üç guruşa ve târih-i i‘lâma gelince beynlerinde cereyân eden cemî‘-i ahz ü i‘tâya müte‘allika âmme-i de‘âvîden mezbûr el-Hâc Osman’ın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 19 min-Receb sene 1206.