Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 932 Hüküm no: 1595 Orijinal metin no: [134a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Armiya v. Avanis’in kumaş ve terzilik ücretinden alacağı olduğu Ma‘rûz Medîne-i Üsküdar’da Büyükhamam kurbünde mütemekkin Hayyât Armiya v. Avanis nâm zimmî medîne-i mezbûrede mahfil-i Bâb’da meclis-i şer‘-i hatîrde Mosi v. Yuda nâm Yahûdî muvâcehesinde merkūm Mosi Yahûdî târih-i i‘lâmdan on sene mukaddem yedimden iştirâ ve kabz eylediği beynimizde ma‘lûm kumaş ve hayatlık ücretinden elli bir guruş hakkımın kırk guruşunu yedinden merkūm Mosi Yahûdî’ye deynim olan hamr ve arak semeninden kırk guruşa ba‘de’l-mahsûb ve’t-takas ve’l-kabûl on bir guruşu zimmetinde hakkım bâkī kalmağla taleb ederim deyü da‘vâ ve merkūm Mosi Yahûdî cevâbında fi’l-hakīka cihet-i mezkûreden bâkī müdde‘î-i merkūma ol-mikdâr deyni olduğunu ikrâr lâkin kabzını mu‘terif olduğu kırk guruş hamr ve arak semeninden yirmi guruşun on bir guruşunu deyn-i mezkûr on bir guruşa ba‘de’l-mahsûb ve’t-takas mâ‘adâ dokuz guruşu taleb ederim deyü da‘vâ ve merkūm Armiya zimmî def‘-i mezkûrunu ve ziyâde müdde‘âsını inkâr etmeğin merkūm Mosi Yahûdî ber-vech-i muharrer müdde‘âsını beyân ve isbâta kādir olamayıp müdde‘î-i merkūm Armiya zimmî bi’t-taleb gıbbe’t-tahlîfi’ş-şer‘î mûcibiyle merkūm Mosi Yahûdî’nin mutâlebesi olan dokuz guruşu müdde‘î-i merkūm Armiya zimmîye bilâ-beyyine mu‘ârazadan ba‘de’l-men‘ mertebe-i ikrârı olan meblağ-ı merkūm on bir guruşun edâsıyla merkūm Mosi Yahûdî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 12 min-M sene 1207.