Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 934 Hüküm no: 1598 Orijinal metin no: [134b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cüzzamlar Zaviyesi Şeyhi Sepetçi Şeyh Ali ile Bektaş’ın şeyhlikten azlolunarak Bursa zaviyesinde ikamet ettirilmeleri ve zaviye şeyhliğine Keleş Mehmed Efendi’nin tayini talebi Ma‘rûz Medîne-i Üsküdar Sipâhpazarı ahâli-i sâireden el-Hâc Mehmed Ağa ve Osman Ağa ve Şeyh Mehmed Emin Efendi ve Hasan ve es-Seyyid Ahmed ve Hafız Mehmed Kadri ve Kethudâ Osman Ağa ve es-Seyyid Bekir Ağa ve eş-Şeyh Mehmed Şûhî ve el-Hâc Mustafa ve el-Hâc Ömer Ağa ve Mehmed Ağa ve İbrahim Ağa ve el-Hâc Ahmed ve diğer el-Hâc Ahmed ve Sun‘ullah ve Mehmed Said ve Mahmud Ağa ve diğer Mahmud ve Hasan Beşe ve eş-Şeyh Mehmed Emin nâm kimesneler medîne-i mezbûrede meclis-i şer‘de medîne-i mezbûre hâricinde Cüzzâmlar Zâviyesi fukarâsından Mustafa ve Mehmed ve Ali ve Hasan ve Ali ve Hüseyin ve Mehmed ve diğer Mehmed ve Ali ve Mehmed ve Osman hâzır oldukları hâlde ez-kadîm fukarâ-yı mezbûrûnun çarşı ve bâzârda geşt ü güzâr ve nâs ile ihtilâtları memnû‘ ve ahz ü i‘tâ husûsunda taraflarından bir nefer kimesne vekîl-i harc ve umûrları rü’yet olunagelip bi’d-defa‘ât kendilere tenbîh olundukda mütenebbih olmayıp bu esnâda şeyh nasb olunan Sepetci Ali b. İbrahim ve Bektaş b. Mustafa nâm kimesneler fukarânın geşt ü güzârında zarar yokdur elbette geşt ü güzâr ederler deyü mele-i nâsda i‘lân eylediklerinden mâ‘adâ mukaddemâ meşîhatden azl ve Bursa’ya nefy ba‘dehû ıtlâk olunup hâlâ zâviye-i mezkûrede sâkin olan Molla Mustafa ırzıyla mukayyed ve kimesneye hilâf-ı inhâ hareketi yoğiken mezbûrân Şeyh Ali ve Bektaş mezbûr Molla Mustafa’nın tard ve ib‘âd ve nefyine amel ve Bâb-ı Âlî’yi tasdî‘ ve fikr-i fâsidinin revâcı mülâhazasıyla umûr-ı lâzımesini ta‘tîl ve tazyî‘-i evkātı sebebiyle fukarâ-i mezkûru mu‘tâd-ı kadîm üzere muhâfaza edemediğinden fukarâ-i mezbûrûnun nâs ile muhâlata ve kendileri mahsûs hamamları var iken Üsküdar hamamlarına duhûllerinden ahâli-i Üsküdar müte’ezzî ve dâimâ ve müstemirren gavga ve nizâ‘dan hâlî olmamalarıyla muhâfazalarına muktedir ve meşîhat nevbeti kendinin zâviyede Keleş Mehmed Efendi b. Halil üzerlerine şeyh nasb ve mezbûr Sepetci Şeyh Ali meşîhatden azl ve temîn-i ahâli-i fukarâ-i mesâkîn için mezbûr Bektaş ile âdet-i kadîmeleri üzere Bursa zâviyesinde ikāmet eylemek üzere fermân-ı âlîleri sudûrunu ahâli-i mezbûrûndan herbiri istid‘â ve istirhâm eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 16 min-R sene 1207.