Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 935 Hüküm no: 1599 Orijinal metin no: [134b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacıosman Fırını’nın kiracısı Agop’un alacak verecek hususunda fırının hissedarları Nefise Hanım ve Kolancı Hacı Ömer ile sulh olduğu Ma‘rûz Medîne-i Üsküdar’da vâki‘ Hâcı Osman Fırını demekle ma‘rûf etmekci fırınında müstecir Agop v. Avakim nâm zimmî medîne-i mezbûrede mahfil-i Bâb’da meclis-i şer‘-i hatîrde mu‘arrefetü’z-zât Nefîse bt. Abdullah nâm hatun ile Kolanî el-Hâc Ömer b. ( ) nâm kimesne mahzarında sâlifü’z-zikr etmekci fırını dört hisse i‘tibârıyla iki hissesi mezbûre Nefîse Hatun’un ve bir hissesi mezbûr el-Hâc Ömer’in ve bir hissesi hazînedârı kayınvâlidesi ( ) nâm hatunun olmağla mezbûrân Nefîse Hatun ve el-Hâc Ömer işbu târih-i i‘lâm senesi Cumâdelûlâ gāyetine gelince on sekizer guruşdan otuz altı guruşu benden mutâlebe ben dahi fırın-ı mezkûra bi-şarti’r-rücû‘ emirleriyle bâ-defter-i müfredât ma‘lûmü’l-mikdâr masrûfâtımı taleb eylediğimde beynimizde münâza‘ât-ı kesîre vâkı‘a olmuşdu el-hâletü hâzihî müdde‘iyân-ı mezbûrânın mutâlebeleri olan meblağ-ı merkūm otuz altı guruşdan ve benim mutâlebe eylediği masrûfâtıma müte‘allika âmme-i de‘âvîden herbirimiz âharın zimmetini ba‘de’l-ibrâ ve’l-kabûl fîmâ-ba‘d fırın-ı mezkûra ta‘mîr iktizâ eylediği eyyâmda mezbûrân Nefîse Hatun ve el-Hâc Ömer’e ihbâr onlar dahi kendileri ta‘mîr ve termîm ve ben dahi fırın-ı mezkûr ücretine rencîde etmeyip mâh be-mâh mezbûrâna edâ ve teslîm eylemek üzere herbirimiz ta‘ahhüd ve bu vechile kat‘-ı münâza‘a eylediklerini mezbûrân Nefîse Hatun ve el-Hâc Ömer tasdîk eyledikleri tescîl ve bi’l-iltimâs huzûr-ı âlîlerine i‘lâm olundu. Fî 10 C sene 1206.