Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 935 Hüküm no: 1600 Orijinal metin no: [134b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Abdullah’ın sattığı at bedelinden altmış kuruş alacağı olduğu Ma‘rûz Medîne-i Üsküdar’da Atpazarı’nda el-Hâc Ali Hanı’nda misâfiren sâkin el-Hâc Abdullah b. el-Hâc Abdülhalim nâm kimesne medîne-i mezbûrede mahfil-i Bâb’da meclis-i şer‘-i hatîrde el-Hâc Musa b. Abdullah mahzarında mezbûr el-Hâc Musa târih-i i‘lâmdan yirmi bir ay mukaddem yedimden iştirâ ve kabz eylediği bir re’s bârgir semeninden yüz on guruş zimmetinde hakkım olup hattâ deyni müş‘ir yedime bir kıt‘a temessük dahi i‘tâ etmişdi el-hâletü hâzihî meblağ-ı merkūm yüz on guruşun elli guruşunu yedinden ahz ve altmış guruşu zimmetinde bâkī kalmağla taleb ederim deyü da‘vâ ol dahi cevâbında fi’l-hakīka müdde‘î-i mezbûra ol-mikdâr meblağ deyni olduğunu ikrâr lâkin müdde‘î-i mezbûr kabzını mu‘terif olduğu meblağ-ı merkūm elli guruşdan mâ‘adâ altmış guruş dahi bi’d-defa‘ât yedine def‘ ve teslîm edip zimmetim berî’e olmuşdu deyü ba‘de’d-def‘ ve’l-inkâr dâfi‘-i mezbûr el-Hâc Musa ber-vech-i muharrer def‘ini isbâta kādir olamayıp talebiyle müdde‘î-i mezbûr el-Hâc Abdullah gıbbe’t-tahlîfi’ş-şer‘î mûcibiyle meblağ-ı bâkī-i merkūm altmış guruşu müdde‘î-i mezbûra edâ ve teslîme mezbûr el-Hâc Musa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 10 min-Receb sene 1206.