Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 936 Hüküm no: 1601 Orijinal metin no: [134b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Mehmed’in kardeşi Mahmud’dan alacağı olduğu Ma‘rûz Medîne-i Üsküdar’da Solaksinan mahallesinde sâkine ve şahsı mu‘arrefe Saliha bt. Mehmed nâm kıbtiye medîne-i mezbûrede mahfil-i Bâb’da meclis-i şer‘-i hatîrde li-ebeveyn karındaşı Mahmud nâm Kıbtî muvâcehesinde karındaşım mezbûr Mahmud târih-i i‘lâmdan üç ay mukaddem yedimden bi-tarîki’l-karz istidâne ve kabz eylediği on guruş ve yine mezbûrun bi-şarti’r-rücû‘ emriyle dâyini gāib ani’l-meclis Mehmed Ağa nâm kimesne yedine edâ ve teslîm eylediğim yirmi beş guruş ve âhar dâyini gāib ani’l-meclis Kavaklıoğlu Ali nâm kimesne yedine kezâlik edâ ve teslîm eylediğim on guruş ve yine mezbûrun gelini Zeyneb nâm kıbtiye-i müteveffiyenin techîz ve tekfînine kezâlik sarf eylediğim altı guruş ki cem‘an cihât-ı mezkûreden elli bir guruş zimmetinde hakkım olmağla taleb ederim deyü da‘vâ ve mezbûr Mahmud dahi cevâbında müdde‘iye-i merkūme yedinden istikrâz eylediği on guruş ile dâyini gāib-i mezbûr Ali için emr eylediği on guruş ki cem‘an yirmi guruş zimmetinde deyni olduğunu ikrâr ziyâde otuz guruşa emrini inkâr etmeğin müdde‘iye-i merkūme ber-vech-i muharrer ziyâde müdde‘âsını beyândan izhâr-ı acz edip talebiyle merkūm Mahmud gıbbe’t-tahlîfi’ş-şer‘î mûcibiyle müdde‘iye-i merkūme ziyâde mutâlebesiyle bilâ-beyyine mu‘ârazadan ba‘de’l-men‘ mertebe-i ikrârı olan meblağ-ı merkūm yirmi guruşun müdde‘iye-i merkūme Saliha’ya edâsıyla merkūm Mahmud ilzâm olunduğu bi’l-iltimâs huzûr-ı âlîlerine i‘lâm olundu. Fî 18 min-Ca sene 1206.