Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 936 Hüküm no: 1602 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Mehmed’in yaptığı hizmet ücretinden alacağı olduğu Ma‘rûz Medîne-i Üsküdar’da tâbi‘ Çavuşbaşı Çiftliği’nde sâkin Ömer b. Mehmed medîne-i mezbûrede mahfil-i Bâb’da meclis-i şer‘-i hatîrde İsmail b. İbrahim mahzarında ben ücret ile hizmet eder makūlesinden olup bundan akdem mezbûr İsmail’in talebiyle dört ay kendiye hizmet etmek üzere otuz sekiz guruş ücret ile mukāvele ve çiftliğinde beş ay hizmetim sebkat etmekle şühûr-ı mezkûrede zimmetinde müctemi‘a olan otuz sekiz guruş ücretimin iki buçuk guruşunu yedinden ahz ve otuz beş buçuk guruş zimmetinde hakkım bâkī kalmağla taleb ederim deyü da‘vâ ve mezbûr İsmail cevâbında müdde‘î-i mezbûru târih-i i‘lâm senesi rûz-ı Kasımı duhûlüne değin otuz sekiz guruş ücret ile istîcârını ikrâr ziyâde hizmetini inkâr etmeğin müdde‘î-i mezbûr ziyâde müdde‘âsını beyân ve isbâta kādir olamayıp talebiyle mezbûr İsmail gıbbe’t-tahlîfi’ş-şer‘î ikrârı mûcebince meblağ-ı bâkī-i merkūm otuz beş buçuk guruşun edâsıyla mezbûr İsmail şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 20 min-Ra sene 1207.