Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 937 Hüküm no: 1603 Orijinal metin no: [135a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Hadice Hatun’un mirasından bir kısmının gizlendiği iddiasıyla vârisleri arasındaki davada ispat gerektiği Ma‘rûz Mahmiye-i İslâmbol’da Kabasakal kurbünde Seyyid Hasan mahallesi sâkinelerinden sâhibe-i arzuhâl mu‘arrefetü’z-zât Fatıma bt. İsmail medîne-i Üsküdar Bâb Mahkemesi’nde meclis-i şer‘-i hatîrde derûn-ı arzuhâlde mezkûr el-Hâc Hüseyin b. Mustafa mahzarında medîne-i mezbûrede Mirâhor mahallesinde sâkine iken bundan akdem fevt olan Hadice Hatun bt. Hasan nâm müteveffiye merhûm Rûznâmçeci Mehmed Efendi’nin oğlu Hasan’ın oğlu Mehmed’in oğlu diğer Hasan’ın kızı Emine’nin sadriye kızı olup hattâ hâlâ İslâmbol Kadısı fazîletlü Şemseddin Efendi huzûrunda ber-vech-i muharrer evlâddan olduğumu ikrâr ve i‘lâm ve mûcebince emr-i âlî sâdır olmuşdu deyü ibrâz eylediği bir kıt‘a emr-i âlî-şânın mazmûnunu mezbûr el-Hâc Hüseyin inkâr etmekle İslâmbol Mahkemesi hademesinden hâzırân bi’l-meclis Mustafa Çelebi b. Ahmed ve Halil b. Ali nâm kimesneler şehâdetleriyle muvâcehesinde isbât eyledikden sonra müteveffiye-i mezbûre Hadice Hatun mezbûr Mehmed b. diğer Hasan’ın kız karındaşı olduğunu merkūm el-Hâc Hüseyin meclis-i şer‘de ba‘de’l-ikrâr müdde‘î-i merkūm cevâbında müteveffiye-i mezbûre benim li-üm hâletem ve zî-rahm cihetinden verâseti bana münhasıra olmuşken terekesine fuzûlî vâzı‘-ı yed eylediğinden mâ‘adâ cem‘an kıymetleri on bin guruşa bâliğ inci kolanlı bir çift elmaslı kuşak ve bir çift elmaslı altın bilezik ve beş aded elmaslı çiçek ve etrâf elmaslı eski ma‘den bir çift zümrüd küpe ve etrâf elmaslı beheri yirmi beşer guruş kıymetli elli aded fındıklı boyun altını ve bir gök yâkut yüzük ve bir elmaslı gerdâniye ve bir elmaslı akarsu ve bir la‘lî yüzük ve bir tepesi elmaslı eski ma‘den zümrüd yüzük ve bir elmaslı zihgir ve bir inci köstekli altın sâ‘at ve bir çalar sâ‘at ve bir semmûr kürk ve bir sincab kürk ve bir kākum kürk ve nakden bin guruş beyaz akçe ve sekiz yüz aded zer-i mahbûb İslâmbolî ve üç aded oda takımını ketm ve ihtifâ etmekle bi’l-verâse taleb ederim deyü da‘vâ ve mezbûr el-Hâc Hüseyin cevâbında müteveffiye-i mezbûre Hadice Hatun zevcem olup sülüs vesâyâsını tenfîze beni vasî nasb edip ve terekesinin sülüsân-ı bakıyesini dahi benim verâsetimi ikrâr ve mukarrun-leh bi’n-neseb olduğuma binâen bâ-defter-i kassâm makbûzum olan terekesinden gayrı eşyâ-i mezkûreyi inkâr etmeğin mûrisesi müteveffiye-i mezbûre Hadice Hatun’un terekesinden olmak üzere hâric ez-defter müdde‘âsı olan eşyâ-i mezkûreyi mezbûr el-Hâc Hüseyin ketm ve ihtifâ eylediğini müdde‘iye-i mezbûre Fatıma isbâta havâle olunup henüz da‘vâlarına faysal verilmediği mazbatada mastûr ve mukayyed olmağla imtisâlen li’l-emri’l-âlî huzûr-ı âsafânelerine i‘lâm olundu. Fî 10 min-R sene 1207.