Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 938 Hüküm no: 1605 Orijinal metin no: [135a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpacı Hasan’ın arpa bedelinden alacağını ödemesi için Abdurrahman Ağa’ya süre verdiği Ma‘rûz Mahmiye-i İslâmbol hısnı ebvâbından Bağçekapısı hâricinde arpacı sâhib-i arzuhâl Hasan b. Mehmed medîne-i Üsküdar’da mahfil-i Bâb’da meclis-i şer‘-i hatîrde derûn-ı arzuhâlde ismi mezkûr Abdurrahman Ağa b. Abdullah mahzarında mezbûr Abdurrahman Ağa bundan akdem yedimden iştirâ ve kabz eylediği keyl ve fiyâtı beynimizde ma‘lûm arpa semeninden altı yüz kırk yedi guruş alacak hakkım olup hattâ işbu târih-i i‘lâm senesi şehr-i Rebî‘ülevvel’inin beşinci günü karz unvânıyla yedime bir kıt‘a temessük dahi i‘tâ etmekle meblağ-ı merkūm altı yüz kırk yedi guruşu taleb ederim deyü eylediği da‘vâsını mezbûr Abdurrahman Ağa ikrâr u i‘tirâf edip lâkin meblağ-ı merkūmu hâlen edâya kudreti olmayıp târih-i i‘lâmdan kırk yedi gün tamamında müdde‘î-i mezbûra edâ etmek üzere istimhâl etdikde ol dahi müddet-i mezkûre tamamına değin temhîl eylediği mübâşiri Süleyman Çavuş kulları iltimâsıyla huzûr-ı âlîlerine i‘lâm olundu. Fî 18 min-R sene 1207.