Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 939 Hüküm no: 1607 Orijinal metin no: [135b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ahmed’in gebe ineğini kaybettiği iddiasıyla Mustafa aleyhine açtığı tazminat davasında sulh olduğu Ma‘rûz Medîne-i Üsküdar’da Arakıyeci el-Hâc Mehmed mahallesinde sâkine ve zâtı mu‘arrefe Fatıma bt. Ahmed nâm hatun mahfil-i Bâb’da meclis-i şer‘-i hatîrde Sığırtmaç Mustafa b. Ahmed mahzarında mezbûr Mustafa târih-i i‘lâmdan on beş gün mukaddem emlâkimden otuz beş guruş kıymetli bir re’s siyâh gebe ineğimi ra‘y ederken zâyi‘ etmekle kıymeti olan meblağ-ı merkūm otuz beş guruşu taleb ederim deyü eylediği da‘vâsından bâ-tavassut-ı muslihîn beş guruş mukābilesinde mezbûr Mustafa ile sulh olup ziyâde otuz guruşa ve mukaddemâ zâyi‘ eylediği buzağıya müte‘allika âmme-i de‘âvîden mezbûr Mustafa’nın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 21 min-R sene 1207.