Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 940 Hüküm no: 1608 Orijinal metin no: [135b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in satın aldığı kır atıyla ilgili açtığı davada sulh olduğu Ma‘rûz Medîne-i Üsküdar’da Toygar Hamza mahallesinde sâkin es-Seyyid Mehmed b. Mehmed medîne-i mezbûrede mahfil-i Bâb’da meclis-i şer‘-i hatîrde Ahmed b. İbrahim mahzarında târih-i i‘lâmdan dört sene mukaddem mezbûr Ahmed’in karındaşı gāib ani’l-beled Bekir nâm kimesneden kırk beş guruşa iştirâ eylediğim bir re’s kır bârgirimi sekiz guruş [kıymetindeki] semeriyle mezbûr Ahmed fuzûlî ahz etmekle taleb ederim deyü da‘vâ ve mezbûr Ahmed cevâbında ahzını ikrâr lâkin zikr olunan bârgir karındaşım mezbûr ile müşterek emlâkimizden olup ve müdde‘î-i mezbûr semen-i meblağ-ı merkūmu edâ edemediğinden bey‘i bi’r-rızâ feshetmemizle binâen-aleyh bârgir-i merkūmu ahz etmişdim deyü ba‘de’d-def‘ ve’l-inkâr dâfi‘-i mezbûr ber-vech-i muharrer def‘ini isbât için es-Seyyid Bekir b. Veli nâm kimesneyi ikāmet ve şâhid-i âharı ikāmeti esnâsında beynlerine muslihûn tavassut edip müdde‘î-i mezbûr eylediği da‘vâsından beş guruş bedel-i makbûza sulh olup bi’l-cümle husûs-ı mezkûra müte‘allika âmme-i de‘âvîden mezbûr Ahmed’in zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî-selhi Ra sene 1207.