Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 940 Hüküm no: 1609 Orijinal metin no: [135b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşcı Todori’nin taş kırma ücretinden dolayı talebiyle davanın muteber olmadığı Ma‘rûz Medîne-i Üsküdar hâricinde Kule Bağçesi kurbünde mütemekkin Taşcı Todori v. Vasil nâm zimmî medîne-i mezbûrede mahfil-i Bâb’da meclis-i şer‘-i hatîrde rençber tâifesinden İlya v. Bogos nâm zimmî muvâcehesinde merkūm İlya zimmî ile karındaşı gāib ani’l-meclis Metro nâm zimmîye beynimizde ma‘lûm taş kırma ücretinden dört yüz yetmiş iki guruş deynim olup merkūm İlya zimmî meblağ-ı merkūm dört yüz yetmiş iki guruşumu asâleten ve vekâleten yedimden ahz ve istifâ edip lâkin gāib-i merkūm Metro zimmîye hesâbımızdan ziyâde sehven yüz guruş def‘ ve teslîm etmemle gāib-i merkūm Metro zimmî hâzır-ı merkūm İlya zimmînin karındaşı olduğuna binâen medfû‘um olan meblağ-ı merkūm yüz guruşu hâzır-ı merkūm İlya zimmîden taleb ederim deyü müdde‘î-i merkūmun ber-vech-i muharrer takrîri üzere tasaddî eylediği da‘vâsı meşrû‘a olmayıp müdde‘î-i merkūm Todori zimmî husûs-ı mezkûrda merkūm İlya zimmîye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 14 min-R sene 1207.