Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 941 Hüküm no: 1612 Orijinal metin no: [135b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize bt. İsmail’in yanında bulunan küçük kız torunu Zeliha’yı çocuğun annesine teslim ettiği Ma‘rûz Medîne-i Üsküdar’da Solaksinan mahallesinde sâkine mu‘arrefetü’z-zât Zeyneb bt. Mehmed nâm hatun mahfil-i Bâb’da meclis-i şer‘-i hatîrde kayınvâlidesi kezâlik zâtı mu‘arrefe Hafîze bt. İsmail nâm hatun mahzarında sâbıkā zevcim olan mezbûre Hafîze Hatun’un oğlu gāib ani’l-meclis es-Seyyid Hüseyin b. Ahmed’in firâşından hâsıla ve benden mütevellide sadriye sagīre kızım Zeliha bi-hakkı’l-hıdâne hacr ve terbiyemde iken ben nefsimi zevc-i âhara tezvîc edip mezbûre Hafîze ol-vechile sagīre-i mezbûreyi yedimden ahz etmişdi hâlâ mezbûre Hafîze sagīre-i mezbûreyi infâkdan âciz ve bi’r-rızâ bana teslîm eyledikde ben dahi ahz ü kabz ve sagīre-i mezbûre hıdânesi sükûtuna dek mâlımdan infâk ve iksâya ta‘ahhüd eyledim deyü takrîrini mezbûre Hafîze tasdîk eylediği bi’l-iltimâs huzûr-ı âlîlerine i‘lâm olundu. Fî 20 min-R sene 1207.