Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 942 Hüküm no: 1613 Orijinal metin no: [136a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Efendi Vakfı’nın cabisi Mehmed Efendi’nin vakıftan alacağı olduğu Ma‘rûz Ashâb-ı hayrâtdan merhûm Abdi Efendi Vakfı’nın câbîsi Mehmed Efendi b. Ali medîne-i mezbûrede mahfil-i Bâb’da meclis-i şer‘-i hatîrde vakf-ı mezbûr mütevellisi mu‘arrefetü’z-zât Hafîze bt. Ahmed nâm hatun mahzarında vakf-ı mezbûrdan almak üzere bâ-berât-ı âlî-şân mutasarrıf olduğum yevmî bir akçe ihzâriyye vazîfemden bin iki yüz üç senesi Muharremi gurresinden iki yüz beş senesi Zilhiccesi gāyetine gelince üç senede müctemi‘a olan dokuz guruş ve kezâlik bâ-berât-ı âlî-şân mutasarrıf olduğum yevmî iki akçe cibâyet vazîfemden altı ayda müctemi‘a olan üç guruş ve vakf-ı mezbûr musakkafâtından mahlûl olan bir bâb menzil mu‘accelesinden ifrâz olunan ber-vech-i mu‘tâd-ı kadîm harc-ı huddâm ile bir bâb âhar menzil ferâğı harcından hisseme isâbet eden beynimizde ma‘lûm yirmi bir buçuk guruş ki cem‘an otuz üç buçuk guruşun sekiz guruşunu hitâbet arzı harcından makbûzum olan sekiz guruşa ba‘de’l-mahsûb ve’t-takas mâ‘adâ yirmi beş buçuk guruş yedinde kalmağla taleb ederim deyü ba‘de’d-da‘vâ ve’l-istintâk ve’l-ikrâr mûcibiyle meblağ-ı merkūm yirmi beş buçuk guruşun edâsıyla mütevelliye-i mezbûre Hafîze Hatun şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 22 min-C sene 1206.