Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 942 Hüküm no: 1614 Orijinal metin no: [136a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Halil’den satın aldığı inek ve buzağının hastalıklı olduğunu iddia eden Hüseyin b. İbrahim’in iddiasını ispat edemediği Ma‘rûz Medîne-i Üsküdar’da tâbi‘ Kādı karyesinde sâkin Hüseyin b. İbrahim nâm kimesne medîne-i mezbûrede mahfil-i Bâb’da meclis-i şer‘-i hatîrde Mehmed b. Halil mahzarında mezbûr Mehmed târih-i i‘lâmdan iki gün mukaddem emlâkinden işbu mu‘âyene olunan bir karasığır ineği buzağısıyla ma‘an cemî‘ uyûbdan sâlime olmak üzere altmış guruşa bana bey‘ ve meblağ-ı merkūm altmış guruşun on beş guruşuna işbu târih-i i‘lâm şehri gāyetinde ve mâ‘adâ kırk beş guruşun dört buçuk ay tamamında kendiye edâ etmek üzere bi’r-rızâ beni tecîl ben dahi ber-vech-i muharrer müeccelen edâya ta‘ahhüd etmişdim lâkin zikr olunan karasığır ineğinin memelerinde illet olup inde’t-tüccâr noksân-ı semen îcâb eder uyûbdan olmağla zikr olunan karasığır ineği ve buzağısı istirdâd olunmak matlûbumdur deyü da‘vâ ve mezbûr Mehmed cevâbında fi’l-hakīka zikr olunan karasığır ineğini buzağısıyla ma‘an cemî‘-i uyûbdan sâlime olmak üzere altmış guruşa müeccelen müdde‘î-i mezbûra bey‘ini ikrâr ve ayb-ı mezkûru inkâr etmeğin zikr olunan karasığır ineğini ehl-i hibreden İsmail b. Mehmed ve el-Hâc Hüseyin b. Mehmed nâm kimesnelere irâe olundukda zikr olunan karasığır ineğinin memelerinde illet olmayıp uyûbdan sâlime olduğunu ba‘de’l-ihbâr mûcibiyle müdde‘î-i mezbûr husûs-ı mezkûrda mezbûr Mehmed’e bî-vech mu‘ârazadan ba‘de’l-men‘ müdde‘î-i mezbûr Hüseyin deyn-i meblağ-ı merkūm altmış guruşun ecel-i merkūm hulûlünde edâsıyla şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 18 min-R sene 1207.