Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 943 Hüküm no: 1615 Orijinal metin no: [136a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Ali’nin eski kocasına açtığı nafaka davasında sulh olduğu Ma‘rûz Medîne-i Üsküdar’da Arakıyeci el-Hâc Cafer mahallesinde sâkine ve zâtı mu‘arrefe Nefîse bt. Ali nâm hatun mahfil-i Bâb’da meclis-i şer‘-i hatîrde zevc-i mutallıkı Yusuf b. Süleyman mahzarında mezbûr Yusuf on beş guruş mehr-i müeccel tesmiyesiyle zevcim olup târih-i i‘lâmdan bir gün mukaddem beni tatlîk etmekle zimmetinde mütekarrir ve ma‘kūdün-aleyh olan on beş guruş mehr-i mezkûrumun üç guruşunu yedinden ahz ü istifâ ve on iki guruşu zimmetinde bâkī kalmağla meblağ-ı bâkī-i merkūm on iki guruş ile nafaka-i iddet-i ma‘lûme ve meûnet-i süknâmı taleb ederim deyü ba‘de’d-da‘vâ ve’l-istintâk ve’l-ikrâr mûcibiyle meblağ-ı bâkī-i merkūm on iki guruşun edâsıyla ilzâm olundukdan sonra müdde‘iye-i mezbûre Nefîse Hatun nafaka-i iddet-i ma‘lûme ve meûnet-i süknâsı’çün zevc-i mutallıkı Yusuf ile beş guruş üzerine terâzî eyledikleri bi’l-iltimâs huzûr-ı âlîlerine i‘lâm olundu. Fî 19 min-Z sene 1206.