Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 944 Hüküm no: 1617 Orijinal metin no: [136a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Hacı Osman’ın ticaret ortaklığından Yakub Reis b. Mustafa’dan elli kuruş alacağı olduğu Ma‘rûz Vilâyet-i Anadolu’da Karasu kazâsına tâbi‘ Lahana Divanı’nda sâkine Hanife bt. el-Hâc Osman nâm hatun tarafından ber-vech-i âtî vekîl olduğu zât-ı mezbûreyi bi’l-mu‘arrefeti’ş-şer‘iye ârifân Halil b. Mustafa ve Mehmed b. Hüseyin nâm kimesneler şehâdetleriyle sâbit olan İsmail b. Veyis medîne-i Üsküdar’da mahfil-i Bâb’da meclis-i şer‘-i hatîrde Yakub Reis b. Mustafa mahzarında müvekkilem mezbûre Hanife Hatun’un merkūm Yakub Reis zimmetinde beynlerinde ma‘lûm cihet-i şirketden üç yüz guruş hakkı olup meblağ-ı merkūmu bin iki yüz beş senesi Ramazan-ı şerîfi’nin yirminci günü mahmiye-i İslâmbol’da Ahîçelebi Mahkemesi’nde müvekkilem mezbûre Hanife Hatun merkūm Yakub Reis’den taleb ve da‘vâ ve lede’l-mürâfa‘a ikrârıyla sâbit olup lâkin merkūm Yakub Reis meblağ-ı merkūm üç yüz guruşu def‘aten edâya iktidârı olmayıp tecîle tâlib ve râgıb olduğundan müvekkilem mezbûre dahi Ramazan-ı şerîf’in yirminci gününden beher şehr tamamında beşer guruşdan altmış ay tamamında edâ etmek üzere bi’t-taleb merkūm Yakub Reis’i tecîl eylediğinde ol dahi ecel-i merkūm hulûlünde müeccelen edâya ta‘ahhüd etmişdi el-hâletü hâzihî târih-i merkūmdan işbu târih-i i‘lâma gelince on altı ayda merkūm Yakub Reis zimmetinde terâküm eden seksen guruşun yirmi beş guruşunu ahz ve bâkī elli beş guruşu zimmetinde kalmağla bi’l-vekâle taleb ederim deyü takrîrine mutâbık bir kıt‘a i‘lâm-ı diğer ibrâzıyla ba‘de’d-da‘vâ ve’l-ikrâr mûcibiyle meblağ-ı bâkī-i merkūm elli beş guruşun edâsıyla merkūm Yakub Reis şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 16 min-M sene 1207.