Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 945 Hüküm no: 1620 Orijinal metin no: [136b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Mehmed Ağa’nın yaptığı hizmet karşılığında alacağı olduğu iddiasıyla açtığı davasında haklı olduğu Ma‘rûz Medîne-i Üsküdar’da Hasanağa mahallesinde sâkin Haseki Mehmed Ağa b. Abdullah mahfil-i Bâb’da meclis-i şer‘-i hatîrde Alemdâr el-Hâc Ahmed Ağa b. İbrahim mahzarında mezbûr el-Hâc Ahmed Ağa’nın Anadolu’da Söğüt kazâsında Abdülhalim Ağa ve Za‘îmoğlu Mehmed Emin Ağa zimmetlerinde olan iki bin üç yüz kırk guruş alacak hakkını tahsîl için târih-i i‘lâmdan on beş gün mukaddem bâ-emr-i âlî beni mübâşir ta‘yîn etdirdip ma‘an kazâ-i mezbûra varıp meblağ-ı merkūm iki bin üç yüz kırk guruşu mezbûrândan tahsîl ve mezbûr el-Hâc Ahmed Ağa kabz edip lâkin mezbûrun bi-şarti’r-rücû‘ emriyle iyâb ü zihâb mesârifi’çün yüz beş buçuk guruş masrûfum olmağla meblağ-ı merkūm yüz beş buçuk guruş ile ecr-i mislim olan yüz kırk guruş ki cem‘an iki yüz elli guruşun yüz doksan guruşunu ahz ve ecr-i mislinden bâkī altmış guruşu mezbûr el-Hâc Ahmed Ağa zimmetinde kalmağla taleb ederim deyü da‘vâ ve mezbûr el-Hâc Ahmed Ağa cevâbında müdde‘î-i mezbûrun meblağ-ı merkūmdan ziyâde ecr-i mislini inkâr etmekle işbu hâzırân bi’l-meclis Haseki Ali Ağa b. el-Hâc Bekir ve Haseki Mehmed Ağa b. el-Hâc Osman nâm kimesneler istihbâr olundukda fi’l-hakīka müdde‘î-i mezbûrun ecr-i misli yüz kırk beş guruş olduğu ihbârlarıyla zâhir olmağın mûcibiyle meblağ-ı bâkī-i merkūm altmış guruşu müdde‘î-i mezbûra edâ ve teslîme mezbûr el-Hâc Ahmed Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 19 min-Safer sene 1207.