Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 946 Hüküm no: 1621 Orijinal metin no: [136b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hüseyin’in sattığı menzil bedelinden alacağı olduğu Ma‘rûz Vilâyet-i Anadolu’da Viranşehir kazâsına tâbi‘ Bayındır karyesi ahâlisinden olup medîne-i Üsküdar’da menzilhânede sâkin Ahmed b. Hüseyin medîne-i mezbûrede mahfil-i Bâb’da meclis-i şer‘-i hatîrde A‘ma es-Seyyid Mehmed b. İbrahim mahzarında mezbûr es-Seyyid Mehmed târih-i i‘lâmdan bir sene mukaddem yedimden iştirâ ve kabz eylediği karye-i mezbûrede vâki‘ menzil semeninden yirmi yedi guruş hakkımın iki guruşunu yedinden ahz ü istifâ ve yirmi beş guruşu zimmetinde bâkī kalmağla taleb ederim deyü da‘vâ ve mezbûr es-Seyyid Mehmed cevâbında müdde‘î-i mezbûra cihet-i mezkûreden ol-mikdâr deyni olduğunu ikrâr lâkin meblağ-ı bâkī-i merkūm yirmi beş guruşu gāib ani’l-beled Mazlum Mehmed nâm kimesneden bi-tarîki’l-havâle bir re’s katır ahz edip ol-vechile zimmetim berî olmuşdu deyü eylediği def‘ini beyâna kādir olamayıp talebiyle müdde‘î-i mezbûr gıbbe’t-tahlîfi’ş-şer‘î mûcibiyle meblağ-ı bâkī-i merkūm yirmi beş guruşun edâsıyla mezbûr es-Seyyid Mehmed ilzâm olunduğu bi’l-iltimâs huzûr-ı âlîlerine i‘lâm olundu. Fî-gurreti Z sene 1206.