Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 947 Hüküm no: 1622 Orijinal metin no: [136b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa’nın aralarındaki mudarabe ortaklığından alacağı olduğu iddiasıyla açtığı davada iddiasını ispat edemediği Ma‘rûz Medîne-i Üsküdar’da Tenbel el-Hâc Mehmed mahallesinde sâkin el-Hâc Mehmed Ağa b. Ali medîne-i mezbûrede mahfil-i Bâb’da meclis-i şer‘-i hatîrde Ahmed Reis b. Mustafa mahzarında vücûh-ı tüccârânda i‘mâl ve bey‘ ü şirâda âharı tevkîle tarafımdan mezbûr Ahmed Reis’e izin ve fâide beynimizde münâsafe olmak üzere mezbûr Ahmed Reis ile târih-i i‘lâmdan bir sene mukaddem akd-i mudârabe-i sahîha edip emlâkimden üç yüz guruş yedine teslîm etmişdim el-hâletü hâzihî meblağ-ı merkūmun iki yüz bir guruşun bi’d-defa‘ât yedinden ahz ve doksan dokuz guruşu zimmetinde bâkī kalmağla taleb ederim deyü da‘vâ ve mezbûr Ahmed Reis cevâbında ber-vech-i muharrer akd-i mudârabe eylediklerini ikrâr lâkin bey‘ ü şirâda âharı tevkîle mezûn olduğuma binâen emti‘a-i mütenevvi‘a iştirâsı’çün meblağ-ı merkūm doksan dokuz guruş ile kendi sefînemi gāib ani’l-beled Cinaz (Çınar) nâm zimmî reis yedine teslîm ol dahi sefîne-i mezkûr ile deryâda gider iken Kapıdağı önünde Kestel nâm mahâlde deryâ kenârında bi-kazâillâhi te‘âlâ bilâ-sun‘ sefîne-i mezkûre şikest ve meblağ-ı merkūm deryâya ilkā birle zâyi‘ olduğunu iddi‘â ve mezbûr el-Hâc Mehmed cevâbında fi’l-hakīka sefîne-i mezkûre mahâll-i merkūmda şikest olduğunu ikrâr lâkin meblağ-ı merkūmu gāib-i merkūm deryâdan ihrâc ve mezbûr Ahmed Reis’e teslîm edip hattâ meblağ-ı merkūmu gāib-i merkūm Çınar (Cinaz) zimmîden ahz ü kabz edip zimmetinde olduğunu ikrâr dahi etmişdi deyü ba‘de’d-da‘vâ ve’l-inkâr müdde‘î-i mezbûr el-Hâc Mehmed Ağa ber-vech-i muharrer müdde‘âsını beyândan izhâr-ı acz edip talebiyle mezbûr Ahmed Reis gıbbe’t-tahlîfi’ş-şer‘î mûcibiyle müdde‘î-i mezbûr el-Hâc Mehmed Ağa da‘vâ-yı mezkûresiyle mezbûr Ahmed Reis’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 20 min-R sene 1207.