Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 947 Hüküm no: 1623 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı İbrahim’in Sarı Gazi Vakfı’nın gelirlerinden istifade edecek vakıf evladından olduğunu şahitlerin haber verdiği Ma‘rûz Medîne-i Üsküdar hâricinde medfûn merhûm Sarı Gāzi evlâdından Bostanî İbrahim b. Kadri b. Lütfullah medîne-i mezbûrede mahfil-i Bâb’da meclis-i şer‘-i hatîrde merhûm-ı mûmâ-ileyhin zâviyesinin mütevellîsi diğer İbrahim b. Hasan hâzır olduğu hâlde karye-i mezbûrede vâki‘ zâviye-i mezbûrenin vakfı arâzisinden hâsıl olan a‘şâr-ı şer‘iyeden zâviye-i mezbûreye olan masrûfâtı ba‘de’l-ihrâc fazla-i vakf beher sene evlâd beynlerinde ale’s-seviye taksîm olunmak şart-ı vâkıf-ı mûmâ-ileyhin vakfiye-i ma‘mûlün-bihâsında tasrîh olunmağla babam müteveffâ-yı mezbûr cedd-i a‘zamımız merhûm-ı mûmâ-ileyhin silsilesinden olup beher sene hissesini zâviye mütevellîsi olanlardan ahz edip mezbûr diğer İbrahim beni hisseden tard etmekle suâl olunsun dedikde gıbbe’s-suâl mezbûr diğer İbrahim cevâbında ber-vech-i muharrer fazla-i vakf evlâd beynlerinde taksîm olunduğunu ikrâr ve mezbûr Bostanî İbrahim evlâd-ı vâkıfdan olduğunu inkâr etmeğin müdde‘î-i mezbûr ber-vech-i muharrer müdde‘âsını Mustafa b. Osman ve Ahmed Ağa b. Mahmud nâm kimesneler haber verdikleri bi’l-iltimâs huzûr-ı âlîlerine i‘lâm olundu. Fî-selhi Ra sene 1207.