Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 949 Hüküm no: 1626 Orijinal metin no: [137a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Molla Mahmud’un borcunu mahkemede teslim ettiği Ma‘rûz Mahmiye-i İslâmbol’da Mahmud Paşa-i Veli Medresesi’nde sâkin talebe-i ulûmdan Molla Mustafa b. Mehmed nâm kimesne medîne-i Üsküdar’da mahfil-i Bâb’da meclis-i şer‘-i hatîrde el-Hâc Molla Mahmud b. Mehmed nâm kimesne mahzarında mezbûr el-Hâc Mahmud’un gāib ani’l-meclis diğer Mustafa b. Hasan’a îkād-ı kanâdîl ücretinden on beş guruş deyni olup târih-i i‘lâmdan beş gün mukaddem mezbûr el-Hâc Mahmud’un bi-şarti’r-rücû‘ emriyle deyn-i meblağ-ı merkūm on beş guruşu gāib-i mezbûra ben mâlımdan edâ ve teslîm etmemle meblağ-ı merkūmu mezbûr el-Hâc Molla Mahmud’dan bi’l-mürâca‘a taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr Molla Mustafa ber-vech-i muharrer müdde‘âsını beyândan izhâr-ı acz birle talebiyle mezbûr el-Hâc Mahmud’a yemîn teklif olundukda yemînden nükûlüyle sâbit olmağın mûcibiyle meblağ-ı merkūm on beş guruşu mezbûr el-Hâc Mahmud meclis-i şer‘de müdde‘î-i mezbûr Molla Mustafa’ya tamamen teslîm eylediği bi’l-iltimâs huzûr-ı âlîlerine i‘lâm olundu. Fî 21 min-Receb sene 1206.