Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 949 Hüküm no: 1627 Orijinal metin no: [137a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe ve Ümmügülsüm ile oğlu Ahmed ve gelini Hadice’nin birbirleri aleyhinde açtıkları tazir davasından bedelsiz olarak vazgeçtikleri Ma‘rûz Medîne-i Üsküdar’da Selami mahallesinde sâkin Mehmed Beşe b. Hasan medîne-i mezbûrede mahfil-i Bâb’da meclis-i şer‘-i hatîrde mu‘arrefetü’z-zât Ümmügülsüm bt. Halil nâm hatun ile sadrî kebîr oğlu Ahmed b. Mustafa ve mezbûr Ahmed’in zevcesi olup kezâlik zâtı mu‘arrefe Hadice bt. Mustafa nâm hatun mahzarlarında mezbûrûn Ümmügülsüm ve Ahmed ve Hadice târih-i i‘lâmdan bir gün mukaddem bi-gayrı hakkın bana sârik ve elfâz-ı kabîha ile şetm eylediklerinden mâ‘adâ mahalle-i mezbûrede vâki‘ menzilimin kapısını dahi taşlamalarıyla mûcib-i şer‘îsini taleb ederim deyü da‘vâ onlar dahi cevâblarında müdde‘î-i mezbûra şetm ve kapısını taşladıklarını inkâr eylediklerinden mâ‘adâ müdde‘î-i mezbûr Mehmed Beşe bi-gayrı hakkın bize mûcib-i ta‘zîr olur elfâz-ı kabîha ile şetm ve ırzımızı hetk etmekle mûcibini taleb ederiz deyü herbiri da‘vâ ve vukū‘ı’l-münâza‘a bâ-tavassut-ı muslihîn müdde‘iyûn-ı mezbûrûn ber-vech-i muharrer eyledikleri da‘vâlarından meccânen fâriğler olup husûs-ı mezkûra müte‘allika âmme-i de‘âvîden dahi herbiri âharın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-Zilka‘de sene 1206.