Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 950 Hüküm no: 1629 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarlasının tasarruf hakkını İsmail b. Ali’ye devretmeye söz verdiği halde sözünde durmayan Hüseyin b. Ömer’in aldığı parayı iade etmesine karar verildiği Ma‘rûz Vilâyet-i Anadolu’da Tosya kazâsına tâbi‘ Yağcı karyesi ahâlisinden olup medîne-i Üsküdar’da tâbi‘ Ören karyesinde sâkin İsmail b. Ali medîne-i mezbûrede mahfil-i Bâb’da meclis-i şer‘-i hatîrde Hüseyin b. Ömer mahzarında mezbûr Hüseyin târih-i i‘lâmdan bir sene mukaddem mârrü’z-zikr Yağcı karyesinde vâki‘ lede’l-ahâli ve’l-cîrân ma‘lûmü’l-hudûd bir kıt‘a tarlasını otuz üç guruş bedel mukābilesinde bana tefvîz va‘ad edip hâlâ âhara tefvîz eylediği mesmû‘um olmağla bedel nâmıyla medfû‘um olan yirmi guruş kıymetli bir çift piştov ve nakden on üç guruş ki cem‘an otuz üç guruşun beş guruşunu yedinden ahz yirmi sekiz guruşu zimmetinde bâkī kalmağla taleb ederim deyü da‘vâ ve mezbûr Hüseyin cevâbında ber-vech-i muharrer ikrâr ü i‘tirâf etmeğin alâ-mûcebi ikrârihî meblağ-ı bâkī-i merkūm yirmi sekiz guruşun edâsıyla mezbûr Hüseyin şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 7 min-Za sene 1206.