Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 951 Hüküm no: 1630 Orijinal metin no: [137b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim b. Hüseyin’in hayvanlarıyla bostanına zarar verdikleri iddiasıyla açtığı tazminat davasında sulh olduğu Ma‘rûz Medîne-i Üsküdar’a tâbi‘ Bulgurlu karyesinde sâkin es-Seyyid İbrahim b. Hüseyin medîne-i mezbûrede mahfil-i Bâb’da meclis-i şer‘-i hatîrde Ali b. Mustafa mahzarında târih-i i‘lâmdan iki gün mukaddem mezbûr Ali’nin sığır ve koyununu oğlu gāib ani’l-meclis İbrahim nâm kimesne medîne-i mezbûre hâricinde Yalnızselvi nâm mahâlde ra‘y ederken hayvanât-ı mezkûreyi mahâll-i mezkûrda vâki‘ bağıma idhâl ve kemâl bulmamış üzüm ve yaprağını ve bir mikdâr kavun ve karpuz bostanımı ekl ve itlâf etdirmekle zararımı taleb ederim deyü eylediği da‘vâsından bâ-tavassut-ı muslihîn mezbûr Ali ile on iki guruş bedel mukābilesinde sulh olup mahsûlât-ı müstehlekeye ve bi’l-cümle husûs-ı mezkûra müte‘allika âmme-i de‘âvîden mezbûr Ali ile oğlu gāib-i mezbûr İbrahim’den herbirinin zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 2 min-Z sene 1206.