Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 953 Hüküm no: 1635 Orijinal metin no: [137b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midillici İsmail b. Hasan’ın kiraya verdiği atını kaybeden Yusuf’a açtığı tazminat davasında sulh olduğu Ma‘rûz Medîne-i Üsküdar’da Büyük İskele kurbünde sâkin Midillici İsmail b. Hasan medîne-i mezbûrede meclis-i şer‘-i hatîrde Yusuf b. Bekir mahzarında mezbûr Yusuf târih-i i‘lâmdan on beş gün mukaddem altmış üç guruş kıymetli bir re’s bârgir ma‘a takımı beher yevm kırk beş para ücret ile benden istîcâr ve zikr olunan bârgiri te‘addî ve taksîrinden nâşi yedinden zâyi‘ etmekle kıymeti olan meblağ-ı merkūm altmış üç guruş tazmîn olunmak matlûbumdur deyü eylediği da‘vâsından bâ-tavassut-ı muslihîn kırk beş guruş bedel-i makbûza mezbûr Yusuf ile sulh olup zikr olunan bârgir ve takımına ve ziyâde kıymetine ve bi’l-cümle husûs-ı mezkûra müte‘allika âmme-i de‘âvîden mezbûr Yusuf’un zimmetini ibrâ ve ıskāt ol dahi bedel-i sulh nâmıyla medfû‘u olan meblağ-ı merkūm kırk beş guruşa müte‘allika âmme-i de‘âvîden müdde‘î-i mezbûrun zimmetini ibrâ ve ıskāt ve herbiri âharın ibrâsını kabûl ve kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 13 min-Z sene 1206.