Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 955 Hüküm no: 1640 Orijinal metin no: [138a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mıgırdıç v. Kirkor’un havaleden alacağı olduğu Ma‘rûz Medîne-i Üsküdar’da Vâlide-i Atik mahallesinde mütemekkin Mıgırdıç v. Kirkor nâm zimmî medîne-i mezbûrede mahfil-i Bâb’da meclis-i şer‘-i hatîrde es-Seyyid Mehmed b. es-Seyyid İbrahim mahzarında târih-i i‘lâmdan dört buçuk ay mukaddem gāib ani’l-meclis es-Seyyid Ahmed b. Abdullah nâm kimesne zimmetinde cihet-i karz-ı şer‘îden otuz guruş alacak hakkım olup gāib-i mezbûrun dahi mezbûr es-Seyyid Mehmed zimmetinde otuz guruş alacak hakkı olup gāib-i mezbûr deyn-i mezkûr ile beni mezbûr es-Seyyid Mehmed üzerine üçümüz bir meclisde olduğumuz hâlde havâle-i sahîha-i şer‘iye ile havâle etmekle meblağ-ı merkūm otuz guruşu taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını udûlden Mustafa b. Hüseyin ve Abdullah Beşe b. Hüseyin nâm kimesneler şehâdetleriyle vech-i şer‘î üzere muvâcehesinde isbât etmeğin mûcibiyle meblağ-ı merkūm otuz guruşu müdde‘î-i mezbûra edâ ve teslîme mezbûr es-Seyyid Mehmed’e şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-M sene 1207.